Sunday, December 30, 2007

روايات و روائيون

عندما رأيت اسم جورج اورويل في موضوع كيمو الاسبق جاءتني فكرة هذا الموضوع.
هذه قائمة بما سأتذكره من افضل الاعمال الروائية التي قرأتها _يعني تجربة شخصية_و التي اوصي بقراءتها جدا. اعلم ان الوقت ضيق للجميع ولكن من يعلم ربما...
1_مسرحيات شكسبير:و منها هاملت،ماكبث،عطيل ،تاجر البندقية،روميو وجولييت و الملك لير
وان كانت مسرحيات و لكن بعد ترجمتها اصبحت في شكل الرواية.و طبعا شكسبير غني عن التعريف لذا لن اعقب.شخصيا اعتبر انه الاول(نمرة واحد يعني)ت.
2_روايتا البؤساء و احدب نوتردام لفيكتور هوجو
وهو الاروع و الامتع وعلامة الادب الفرنسي .ابحث عن نسخة كبيرة لان متعة فكتور هوجو في وصفه الرائع و الذي يختزل كثيرا في النسخ الصغيرة(يعني اللي زي بتاعت ماما سوزان و الهلال )ت
3_الجريمة و العقاب للروسي ديستويفسكي:
افضل من كتب في تحليل الشخصيات و نفسياتها.يسلك بك في دهاليز العقل في رحلة لا يمكن ان تجدها عند غيره(حاسب اوعى تتوه منه)
4_روايتا 1984ومزرعة الحيوان للانجليزي العبقري جورج اورويل:
يجب ان اقول ان رواية 1984 هي روايتي المفضلة.رواية عبقرية بحق ولكن احذر فقد تصاب باكتئاب حاد بعد الانتهاء منها (ودا اللي حصل معايا بالمناسبة)وايضا اقرأ بتمهل لان الرواية صعبة الفهم(يعني ممكن تقرا الصفحة مرتين وتلاتة لحد ما تفهم هو عايز يقول ايه بالظبط)
5_ذهب مع الريح للامريكية مرجريت ميتشل:
تحفة وحيدة .حيث لم تكتب الكاتبة شيئا مميزا غيرها.ولكن هذه الرواية الوحيدة كانت اكثر من كافية لتضعها على القمة.
6_جين اير للانجليزية شارلوت برونتي:
رواية كلاسيكية جدا.رومانسية جدا وتتميز بنهاية غير مأساوية (يعني مش هاتزعل في اخرها)جميلة جدا فعلا.
7_وداعا ايه السلاح للامريكي ارنست همنجواي:
قصة حب ملتهبة في وسط الاحداث الجسام .في وسط نيران الحرب العالمية الثانية.و...بس..كفاية كده.
8_قصص الامريكي ادجار الان بو:
هي ليست روايات بالمعنى المفهوم و لكن اذكرها هنا لاتها من نوع خاص .قصص رعب .
وطبعا ملك قصص الرعب هو ستيفن كينج ولكن بو له طابع خاص . مذاق مختلف ولكي افسر لك اكتفي بالقول انه كان مختلا عقليا _سايكو يعني_ ولذلك تجد اثار عقله المريض في كتاباته ومن افضلها سقوط منزل اشر و قناع الموت الاحمر.
9_الشاعر للفرنسي ادمون روستان او الاسم الاخر سيرانو دي برجراك:
ابحث عن نسخة بترجمة مصطفى لطفي المنفلوطي فهي افضل ترجمة.رواية رومانسية شاعرية جدا جدا جدا.احذرك...اقرأ الفصل الاخير لوحدك(يعني اقفل على نفسك وانتا بتقراه)لانك ستبكي بغزارة ان كان عندك احساس (اه عيطت ...لا اتهريت من العياط في اخر الرواية)حقيقي هاتدعيلي.
10_طبعا في العربي الافضل هو نجيب محفوظ و لكن ارشح لك رواية لعباس العقاد اسمها سارة_اه الرواية اسمها سارة_:
.دائما العقاد يكتب بعقله و لكن في هذه الرواية بالذات تحس ان هناك جزءا كبيرا من قلبه و احساسه فيها وهو ما قد يشكل دليلا انه كان يكتب عن سارة التي كان يحبها في الحقيقية.
طبعا هناك الكثير و الكثير و لكن المجال لا يتسع و اظن شخصيا ان هذه المجموعة من افضل ما كتب فعلا.
اسف للاطالة.و.....تصبحوا على خييييييير.

Friday, December 28, 2007

يوسي ماس

عارف يا حماده لو حفظت جدول الضرب بتاع الاتنين

الميس هتحبك اوي وهتجبلك بونبونايه وكمان هتكتبلك في الكراسه عشره على عشره ونجمتين

وامضاء ولي الامر

وممكن تبقى محظوظ اوي يا حماده والميس تديلك بوسه

يلا قول ورايا

اتنين في واحد باتنين

اتنين في اتنين باربعه

اتنين في تلاته بسته
............................................
انسف حمامك القديم










الناس اللي بتفكر_ده اللي بتفكر_اكتشفوا ان الذكاء مش كله موهبه ده اكتر من تسعين في الميه منه تدريب

اكتر من مية مليار خليه في مخك بيشتغلوا وكل واحده ليها وظيفه والبني ادم الذكي هو اللي عنده تنسيق احسن واسرع مابينهم

وده بيحصل عن طريق التدريب

انك تعمل ميكس ما بين التفكير والتخيل والذاكره والابداع وكل مراكز مخك

والناس اللي بتفكر_ده اللي بتفكر_اكتشفوا ان العمليات الحسابيه لو تم معالجتها بطريقة معينه هتوصل للميكس ده وتنمي ذكائك

الموضوع كله انهم بيستخدموا عداد اسمه الأبيكس وده مش جديد على فكره ده استخدموه في الصين من اربعتلاف سنه واتطور مؤخرا في ماليزيا لما اخترعوا فكرة اليوسي ماس



وفكرة عمله بتعتمد على ان الطفل يقوم بالعملية الحسابيه باديه الاتنين عشان الفصين يشتغلوا وفي نفس الوقت ذاكرته تشتغل لانه بيحول الارقام المكتوبة لاشكال من الخرز فبيطبع في دماغه مثلا ان الشكل الفلاني معناه

56478

وهكذا



وبعد فترة معينه من التدريب ممكن يحل معادلات معقدة جدا وارقامها خرافيه بالنسبة للجهله من امثالنا ويطلع حلها في منتهى البساطه

وتلاقي الولد من دول بعد ما تديله المعادله بيحرك ايديه الاتنين في الهوا عشان يتخيل شكل العداد ويطلعلك الناتج بسرعه وانتا تتفرج عليه ولسانك_سوري يعني_مدلدل من الانبهار

فعلا نتايج برنامج اليوسي ماس عبقريه




انا على فكره كان نفسي اتكلم عن الموضوع ده كتير من الناحيه التيكنيكال بس اعذوروني عشان انا من الناس اللي اتعلموا بالطريقة بتاعة الميس بتاعة البوسة اللي فوق ومفهمتش كل حاجه عن الموضوع

بس الاكيد_الاكيد فعلا يعني_اننا اتعلمنا وبنتعلم وهنتعلم غلط

جتنا نيلة في حظنا الهباب

Thursday, December 27, 2007

دفـاعــا عـنــا

تأثرا بمقال:شباب عاوز الحرق!
لجارى العزيز الكاتب والطبيب د.أحمد خالد توفيق



دفـاعــا عـنــا



فى مرة جرب كده وروح لشيخ وقور عليه علامات التقوى واسأله: يا عم الحاج , ايه رأيك فى شباب اليومين دول؟

هتلقيه أرغى وأزبد وطار الوقار من على وجهه ومش بعيد دقنه تقع ويصرخ فيك: شباب تافه جاهل وقليل الادب سافل شهوااااااااااااااااااااااااانى

قول له بالراحة يا عم الحاج مش عايزين سكتة قلبية من مجرد سؤال. الشباب الشهوانى ده يا سعادة الباشا ممثل الجيل السابق وما قبله انتو اللى خليتوه شهوانى لأنكو ببساطة حرمتوه من أبسط الحقوق اللى بيمارسها أى قط فى مقلب الزبالة : المسكن والزواج!


واديتوله سفينة أكل السوس كل لوح منها والمسامير فكت وصدت وطالبتوه انه يمشى بالسفينة دى فى وسط البحر بين الدول , فبص حواليه لقى البوارج وحاملات الطائرات فسأل باستغراب: أمال كنتو بتعملو ايه وانتو ماسكين السفينة دى؟؟

فاتهمتوه انه شباب كسول وعايز كل حاجة تيجى سهلة !

حتى الاعلام , تحس ان فيه اجماع بين وسائل الاعلام المختلفة ان مصر ابتليت بألعن جيل من الشباب فى العالم كله ونسى الاعلام ان هو نفسه اللى قدم للشباب ده الكثيروالكثيييييييييييييير من هيفاء وبوسى سمير وأخواتهن

فى الحقيقة احنا الشباب مزنوقين بين نوعين من الصحافة , صحافة موالسة لأبعد الحدود تعلن هى عن زيادة الأسعار فى كذا وكذا وبعدين تبارك الخطوة الجبارة دى اللى اتأخرت عقود

تعظم فى الاشتراكية فى عهد عبد الناصر وتلعن أبوها فى عصر السادات.

وصحافة تانية معارضة لمجرد المعارضة فقط بتسلب الشباب حاجات كتير بيفخرو بيها من غير ما تحس. ولولا خوفهم النسبى من النظام الحالى كانو قالوا ان المصريين ماعبروش قناة السويس فى حرب أكتوبر , لقد تحركت القناة بضعة كيلومترات الى الغرب !

يخرج علينا التليفزيون فى برنامج على هيئة مذيعة حاطة على شعرها ازازة ماء أكسجين كاملة وعلى وشها أطنان من المساحيق خلاها أشبه بخباز فرن العيش بعد ما يغربل الدقيق وبتسأل الشباب مين هو وزير (التوابع المضادة) الحالى أو وزير (التعاون الاعلامى التخطيطى) ومايردش حد فتصرخ فينا الصحف ياريت الشباب يهتم بعقله زى ما بيهتم بالجيل اللى بيحطه على راسه...

ماليش رد على دى غير بجزء من رواية جورج أورويل الرائعة واسمها (1984) لما البطل كان بيسأل حبيبته (هل كان الحزب فى حرب مع ايستاسيا أولا أم كان فى حرب مع أوراسيا؟) تعليق أورويل نفسه قال ان البطلة ماهتمتش أصلا (لأنها لا ترى فارقا بين هراء وآخر)

بالظبط كده , الشباب برضه مش مهتم ومش هيهتم لأنه مش شايف فرق (بين هراء وآخر) هو ماخترش الوزير عشان يبقى مطالب انه يعرف اسمه ومش عارف مميزات ده عن اللى قبله

اسمحلو للشباب انه يختارهم وبعدين انصبوله المشانق لو معرفش

نفس الأمر ينطبق عالأسئلة من نوعية (متى انتهى حكم مملكة الأنباط) و (ما طول نهر الميسيسيبى) وغيرها من ثقافة الكلمات المتقاطعة وزى ما بنقول عليها فى شلتنا (المعلومات الفاشلة) لأن الثقافة تعريفها فى أى معجم : هى استخدام ما تملك من معلومات فى تكوين مفهوم متكامل عن العالم وكيفية التعامل معه


يسألنى البعض -حلوة البعض دى- يعنى انت قصدك ان الشباب اليومين دول ملايكة؟؟

هقول لأ مش ملايكة , ومش شياطين برضه. لكن كل الحاجات دى - وحاجات تانية مش لازم نقولها دلوقتى عشان بلاط الحبس بيكون ساقع فى الفترة دى- هى اللى ممكن تخليهم شياطين

وأنا كمان بتنرفز لما أشوف شباب روش طحن بيقول (أصل احنا مش لاقيين السيمبول -الرمز- اللى نتلم حواليه عشان نكون أكتيف) !

أحمد ربنا كتييييييير ان مفيش رمز زى سعد زغلول مثلا يتلموا حواليه والا كانو هيمشو وراه يهتفوا:

تعيش مصر كوووووووووووووول ومستقلة
!

تشيلسي و...السادات!!!

بحب تشيلسي.اه و بشجعه سواء كان الاول او العاشر. من غير تعصب ,بس بشجعه حتى من قبل ما تحصله الطفرة البترولية لما ابراهيموفيتش اشتراه.ماتقوليش ليه. اصل التشجيع دا حاجة مش منطقية خالص.ليه بتحب الفريق الفلاني او الرياضي الفلاني؟سؤال مفيش حد يقدر يرد عليه رد مقنع.و بعدين جه ماتش تشيلسي و الارسنال الاخير_وكان بقالي فترة كده مش بشوف ماتشات_وروحت اتفرج عند واحد صاحبي.وبدأ الماتش و كنت بقى كالعادة متحمس جدا و بشجع على الاخر و بعدين الاقي المدرب الصهيوني_بتاع تشيلسي للي مش عارف_طالل على الشاشة بوشه الاتم.والاقي نفسي اتقفلت كده و فترت.مش عارف مش عارف اهضمه مش مبسوط كده بوجوده.قولت معلش لقيت تيري بيزك و طالع من الملعب طب مين مكانه الصهيوني التاني بن حاييم و من اول ما وشه الفقر طل على الملعب وفى اول مشاركة ليه راح جالاس ضاحك عليه و زقه و حط الكورة جون.مش دي المشكلة المشكلة اني بدأت كده ازهق و اتقفل وبيني وبينكم بقيت محرج وانا باشجع الفريق.مش عارف اتعامل مع الوضع.ماهو كل شوية صورة المدرب وصورة الاعب.المهم في نهاية الماتش بعد ما ارسنال كسب لقيت نفسي باقول احسن و ماكونتش زعلان ان تشيلسي خسر ابدا.قعدت افكر في الحكاية دي و اقول طب ماهو ابراهيموفيتش يهودي و سبيلبيرج_المخرج_مثلا يهودي و ارد و اقول لا بس الاسرائيلي غير. الصهيوني غير.فعلا بجد ماعرفتش اعديها حاجة كده مالهاش تفسير زي كده تشجيع فريق معين.حاجة كده في دمك في تاريخك وفي قلبك بتقول لا.من بعد الماتش بقيت بتكسف حقيقي اقول اني باشجع تشيلسي ماكونتش واخد بالي يمكن بس بعد الماتش الوضع اختلف.طيب هاتقوللي قصة جميلة انت بقى عايز تقول ايه؟هاقولك يا سيدي لما قعدت افكر في الموضوع دا افتكرت كده حوار على قهوه مع صديق(هو عارف نفسه مش هاقول هو مين)قعد يقوللي اه والسادات بطل و المعاهدة تمام وانت يعني كنت عايزنا نقعد نحارب لحد دلوقت.و لقيت صديق تاني(برضه هو عارف نفسه ومش هاقول هو مين)بيصدق على كلامه!!!و استغربت جدا ..دا انا مش عارف اشجع الفريق اللي كنت بحبه جدا عشان كده صاحبه خد خط الصهينه..تيجي انت تقوللي و مالوه..نهادن و نعاهد و نطبع و نصهين بس معلش بلاش نحارب..اصل الحرب دمار و خراب ديار و شباب بيموت و نسوان تترمل وعيال تتيتم..طب و احنا عايشين ازاى ماهو الدمار و خراب الديار وموت الشباب _وهو حي كمان_و ترمل النسوان و تيتيم العيال حاصل اهوه من غير حرب ولا دياولو.تقوللي الحرب بتخرب الاقتصاد و تعيش البلد كلها في ازمة.دا على اساس ان الاقتصاد جامد والازمات كلها محلولة؟!!!طب ايه رأيك ان اقتصادنا ايام الحرب كان احسن من دلوقت و احنا عال العال و ولا حرب ولا حاجة!!تقوللي طب و ايه الفرق ماهي خربانة كده، وكده برضه خربانة..اقوللك فرق كبير قوي انك تعيش جعان و عريان بس معاك كرامتك احسن ما تعيش شبعان و مكسي من غير كرامة..فما بالك بقى انك عايش جعان و عريان و من غير كرامة برضة..!!!يا اخوانا و الله ماهو هبل ولا يعني شعارات واحنا جامدين و هنحطم اسرائيل و معاها امريكا كمان و كلام احلام مالوش دعوة بالواقع. كل اللي باقوله عيب نقول على الغلط صح و نقول ماكانش في غير كده. لا كان فيه بس الارادة اللي ضعيفة...قوي.كان فيه اكتر بس سقف احلام القيادة كان واطي...قوي.وبعدين دلوقت تطلع علينا القيادة الجديدة بصورة تقطر عارا و خزيا.اكيد كلكم شوفتوا الصورة اللي ايهود اولمرت طالع فيها_بوشه الاتم برضه_مع قيادتنا الرشيدة الحكيمة_كما يقال و العهدة على الراوي_وهما حاطين ايديهم على كتف بعض و بيضحكوا و منشكحين جدا.تقوللي و المعاهدة مالها ؟مال الصورة دي بموضوعنا ؟ماهي الحكاية مقدمات و نتائج.المقدمات الفلانية توصلنا للنتائج العلانية!!وللا انتو رأيكوا ايييييييييييييييييييه؟
نكتفي بهذا القدر و تصبحوا على سلام.

Wednesday, December 26, 2007

مبروك يا رجاله





الموضوع ده عامل زي مجله احنا اللي بنصدرها

تدوينه رائعه...بدايه مدويه ورهيبه
شخصيا لم اكن اتوقع السرعه والمجهود الخرافي
وشكرا علي المجهود الكبير من كاسبر يالذات
وطبعا مشاركات مصطفي وقدوس وميرو وزاجو و سانتا وعقبال الباقي

احب ابدأ مشاركاتي بسؤال هايف شويه بس محيرني

هو بوجي كان ولد ولا قرد؟؟؟؟؟؟؟
محدش يستخف دمه ويقول عروسه



انا شايف انه كان ولد صغير
طبعا هو ملهوش انف..وبقه كبير شويتين
بس ازاي طمطم كانت اخته وفي نفس الوقت كانت ارنب

ده احنا كان بينضحك علينا ضحك؟؟

السؤال التاني في ماده الكارتون
هو ليه جيري دايما كان بيكسب توم
هو توم ده كان شرير ولا ايه؟
عموما كان عندي احساس بانه كان كارتون
موجه وشخصياته رموز ودلوقت مش مقتنع بكده

سلاااااااااااااااااااااام
اسف لو كنت زودتها شويه

Congratulations





Congratulations on the the blog which i wish it lasts forever, and if man is known by the company he keeps then i'am so proud that u r my fellows.

قال ايه.......اوروبا زعلانه...

بسم الله الرحمن الرحيم
أولا احب اهني شباب ال11...اللي انا بحبهم وبموت فيهم ...بلمتنا اللي ظهرت اكتر في نطاق هذه المدونة الي نتمى انها تستمر ان شاء الله
وهبدأ اولى مشاركاتي بكلام ظريف جداااا سمعته النهارده في برنامج العاشره مساء
..
لما كان موضوع الحلقه عن البحث العلمي
...
وكانت المفاجئه ليا انا ووالدي لما سمعنا الارقام دي
...
1.6
مليار دولار سنويا تنفق على البحث العلمي من الدول العربيه مجتمعه...يعني (لكشه واحده)بيدفعوا المبلغ ده
كتر خيرهم
240
مليار دولار سنويا تنفق من الولايات المتحده الامريكيه لوحدها على البحث العلمي
مساء الفل
....
6
مليار دولار سنويا تنفق على البحث العلمي ..
ومن مين كمان
من اسرائيل
....
مساء ال......على رأي اخونا حازم
الدول العربيه تنفق ما يقارب ال 20 مليار دولار سنويا ان لم يكن كثر على......
الدجل والشعوذة
لأ كده بقى روح صالح تحوم في المكان
ويتوالى مسلسل الصدمات
واسمع ان اوروبا قال ايه زعلانه....فعملت اجتماع ضمت فيه العلماء اللي حصلوا على جوائز نوبل
..
طب يا ترى سبب الزعل ايه وسبب الاجتماع ايه
...
كانت يا جماعه بتناقش (تدني مستوى البحث العلمي في الفتره لاخيرة) لا تعليق
انا قلت الكلمتين اللي عندي والسلام
...
لو حد عارف الناس اللي احنا عايشين في وسطهم دول هيودونا لحد فين ...وهل لما هيودونا هيسيبونا نرجع تاني ولا لا؟؟؟؟يقولي والنبي عشان انا من ساعتها والحياه بقى لونها وردي
...
والدنيا ربيع
والجو بديع...
وقفل على
كل المواضييعععععععععععععععععععع
وسلام مربع لسعاد حسني
...
all we have today is to wait for tomorrow
سلام

Tuesday, December 25, 2007

صباح الخــــــــير


بعد التحيه.....................تحيه كمان

هو في الحقيقه انا مش عارف اكتب ايه بعد الناس الجامده دي كلها .....بس الاول احب اقول ليه انا اختارت الاسم ده في الحقيقه لان سانتا هو الشخصيه الوحيده في العالم اللي بيديك اللي انت تطلبه منه من غير ما ينتظر منك حاجه ومفيش حد بيعمل كده في الدنيا غير ابوك وامك .....بس مش معقول هاكتب اسم عيلتى في النت فاخترت سانتا .....هو طبعا انا مش زيه لأ ن انا مش اهبل علشان اعمل لكل واحد حاجته علي طول الخط

المهـــم ....انا احب احيي كاسبر لانه نفذ الفكره وهى فكره من حوالي سنتين بس هو سبق ونفذها

واحب احييكوا بأكأب رباعيه لعمنا المرحوم صلاح جاهين.....علشان تكتئبوا اكتر واكتر


خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي
ســـــــــلام
سلامو عليكو.
ايوه هو انا .الحق اكتب اي حاجة قبل ما النت يقطع.
بعد التحيات و التهاني ....
عندي قصة و سؤال. نبدأ بالقصة: هي القصة دى حصلت معايا العيد اللي فات دا و حبيت اشارككم بيها. القصة بدات لما تعبت في العيد و ما عرفتش اعيد و بعدين جه تالت يوم وقولت لازم بقى اعمل اي حاجة و كنت قاعد مع اصحابي فجت فكرة... ما تيجوا ندخل سينما ...والله فكرة . و بعدين الناس كلها قالوا ماشي سينما.طب امتى؟ اتفقنا على الميد نايت.طب فلان هاينزل السوق يشتري كذا و التاني في محل ابوه بيعمل كذا الى اخره.المهم نزلنا من الساعة 8 ولأن كل واحد وراه حاجة و انا مصر على المشروع فكان لازم انا اللي اشوف السينمات و اقطع التذاكر وغيره.طب في مشكلة العدد كبير واحنا من سبرباي زي ما انتو عارفين و هانطلع من السينما الساعة تلاتة يعني عايزين كمان عربية .طب نرجع انا وعماد نجيب عربيتهم .نروح السينما .يقوللك الحجز الساعة 10 الدنيا زحمة موت و عشان نعدي من قدام الشارع بتاع السينما ييجي نص ساعة.و بعدين نمشي وارجع الساعة 10 و اقف في الزحمة تاني اقطع التذاكر و امشي يتصل بيا واحد و معلش اقطعلى كمان تذكرة ارجع تاني و الزحمة و النص ساعة . واقطع وامشي يتصل كمان واحد طب معلش كمان تذكرتين و اعيده تاني . عذاب و كل دا وانا مصر جدا ان الموضوع يمشي و دي كمان مش كل التفاصيل دي صورة للمثال بس . واخيرا الشباب وصلوا و انا مستني قدام السينما و قولت فرجت لقيت الدنيا اتزحمت جدا قدام الباب و قالولي السينما باللي يدخل الاول يعني لازم تزاحم عشان تاخد مكان كويس عيد بقى. طب نقف في الزحمة . لا انتا لا . انتا تستنى الناس اللي لسه ما جاتش مش انتا اللي معاك التذاكر!!ماشي استنى...وقعدت اتفرج على الناس اللى قدام السينما . زحمة رهيبة اكتر حتى من الناس على طوابير العيش!!!كل الشباب دا جي دافع فلوس و بيزاحم و صابر الصبر دا كله عشان يدخل سينما...!!ولقيت واحد اعرفه متكدر قوى عشان ناقصه تذكرة لواحد صاحبه و مش لاقي و جه يسألني معاك تذكرة زيادة قولتلو لا فمشي وهو زعلان قوي. قعدت افكر في اللي انا شايفه و في الموقف اللي حصل دا و فجأة لقيت الساعة عدت 12 و الناس لسه ماجتش. اتصلت باصحابي اللي دخلوا فقالولي انهم حاجزين اماكن كفاية. قعدت استنى و ادور على المتأخرين في وسط الزحمة لحد ما جم اخيرا . خدت نفس عميق اخيرا خلص الموضوع على خير.طلعت التذاكر واديتهالهم . خدوا التذاكر و جريو بسرعة عشان يدخلوا و بعدين واحد فيهم افتكر فوقف و بص وراه لقاني واقف مكاني . سألني ... مش جاي؟ لقيت نفسي ببص على التذكرة بتاعتي وما رديتش عليه. مشيت اديت التذكرة للراجل اللي كان ناقصه تذكرة و متكدر عشنها وركبت العربية و روحت اناااااااااااااااااااااااااام.
السؤال دلوقت حد حصله حاجه زي دي قبل كده؟
. قصدي يعني تيجي عليك لحظة تلاقي نفسك بتعمل تصرف غريب جدا وتحس ان اللي بيعمل التصرف دا واحد تاني و انت بتتفرج عليه. !!!
شاركونا.............

(1) طرقات على باب السعاده



محبط؟..تعبان؟؟..حزين؟
حاولت تفرح و ماقدرتش؟
هقوللك على نصيحه تمتد فى كذا حلقة ان شاء الله..يمكن تساعدك..و ابقى ادعيلنا لو نفعت !!

مصدرها؟
تجارب شخصية و بعض ما أتذكرة من محاضرات التنمية البشرية

أكيد طبعا هبقى بهرج لو قلت لك ان دة العلاج أو الحل السحرى !!

لكنها محاولة يا سيدى..و خيركم من يجود بما عندة !!



1:خد القرار..انسى اللى مضايقك

لكل شىء سكـون بعد فورتة....و كل عـيـن الى غمض و اغفاء
ألا تـرى الـيم تطغى فية موجته....تقطع الـقـلب من هم و بأسـاء
حتى اذا بلغت مجهودها..فنيت....من بعد جلجلة منها و ضوضاء

"الأبيات لابراهيم عبد القادر المازنى"

يبقى اول خطوة يا سيدى الفاضل هى انك تدرك تماما انه مهما كان السبب..و مهما كانت حالتك المعدنية..قصدى المعنوية..ففى النهاية كل حاجة بترجع لطبيعتها و بترجع لسكونها بأمر الله
و ان حزنك دة - مهما كان كبير و أيا كان سببة -فمصيرة الى زوال ان شاء الله

فاكر كلمات أغنية كنت بحبها جدا زمان..كان بيغنيها زين العمر..كان فيها

"سهار و مشور و انسى همومك..دور ع الأوقات الحلوى
قلبك هو اللى بيلومك..لو مرة ع الهم بتنوى
ما بعمرك تندم ع الماضى..عيش الحاضر فكرك فاضى"

يبقى نتفق يا صديقى العزيز ان الحزن و الاحباط و اليأس لا هم مطلوبين و لا هم الأساس

الأصل هو السعاده..و ربنا سبحانة و تعالى ان كان بيبتلينا فى وقت أو أوقات من حياتنا..دة فى حد ذاته مصدر للسعاده
لأنك فى الحالة دى بتبقى على يقين حقيقى ان الابتلاء دة مصدر للسعاده فى الأيام الجاية فى الدنيا..و كمان فى الآخره ان شاء الله
"ضاقت فلما استحكمت حلقاتها..فرجت....و كنت أظنها لا تفرج !!

انت عايز تقول اية ياعم ؟؟ صدعت دماغنا !! -
- باختصار شديد:أولى الخطوات :اليقين التام فى أن الحزن أو الضيق هو مرحلة مؤقته ان شاء الله
و حتى الألم اللى ممكن تحسة دة..أنت مثاب علية كمان ان شاء الله

هى دى على ما أظن و بتقديرى الشخصى المتواضع أولى و أصعب الخطوات فى طريق السعاده:اليقين فى الفرج

و انك تاخد بجد بجد القرار بأنك تخرج من نفق الحزن المنفر دة الى اشراقة شمس الأمل و التفاؤل..و خليك فاكر
"تفاؤلوا بالخير تجدوة"



يستكمل فيما بعد.......

Monday, December 24, 2007

كاتيجوريز طلبة كليتنا

All for one, One for all
Brother to brother, yours in life and death
والله كل الكلام ده ميوصفش انا بحب اصحابي قد ايه خصوصا دلوقتي
وفعلا فرحان جدا بلمتنا مؤخرا وفرحان اكتر بالمدونة دي وان شاء الله تلمنا اكتر واكتر واكتر
طبعا انا اتحطيت في موقف زي الزفت لان اللي هيقرالي بعد خليفة هيحس انه بياكل الحادق بعد الحلو
وعشان اهرب من الموقف ده هخلي الموضوع ده حاجه في الفنفنه كده
هحط كليب وقع تحت ايدي من فترة كده بس زي العسل ,هحكيلكم قصته
وانس ابوكم تايم يا شباب, شوية شباب في طب القصر العيني قرروا يقسموا طلبة الطب لخمسه كاتيجوريز
وبعد ما قسموهم صوروهم في كليب وعملوا لكل كاتيجوري اغنيه كباك جراوند مش عارف اقولكم قد ايه الاغاني لايقه وقد ايه تقسيمهم مظبوط
مش هحرقهولكم بقى اتفرجوا بنفسيكم
بالمناسبة انا بقالي فترة حاسس بالشر بيتحرك جوايا وكنت ناوي اعمل حركه شريرة بجد واطلب منكم كل واحد يصنف نفسه في كاتيجوري
وبعدين نويت اعمل حركه تانيه كانت هتخلي ابليس مجرد تلميذ فاشل من تلاميذي
كنت هخلي كل واحد يدخل ويصنف العشرة الباقيين كل واحد في كاتيجوري
بس قلت انا كده هقفل المدونة من قبل ما تفتح فكفايه اوي كل واحد يقول رأيه في الكليب
وكل سنه وانتم طيبين ويا رب نفضل مع بعض على طول


Sunday, December 23, 2007

Eleven on the field with the heart of a gladiator...





سريعة مرت سنوات طوال .. منذ أن عرفنا طريق الجامعة .. التقينا -على اختلافاتنا الفكرية- و تآخينا و قبل كل منا أخيه بما له و ما عليه



نحن أحد عشر صديقا .. جمعتنا الأيام و اندمجنا فى بوتقة واحدة .. يطيب لى أن أسمى هذة الرفقة الرائعة "الأحد عشر رجلا من ذهب" . و لعمرى انها لرفقة تستحق هذا الاسم


و نتيجة لطول المعرفه و مرور الزمن .. واتتنا فكرة انشاء هذة المدونة
..

و جل ما نتمناه هو أن نعبر عن آرائنا و أفكارنا وطموحاتنا .. ولا نتمنى سوى ذلك

نرحب باقتراحاتكم .. فشاركونا بآرائكم .. و تعليقاتكم و أفكاركم و ذلك

لأننا نؤمن بتطوير الذات و نؤمن أيضا أنه لولا النار لما أصبح الذهب أنقى


الى الأحد عشر صديقا:تذكروا الحكمة التركية القائلة:

"لكى يكون لك أصدقاء .. لا بد ان تكون انت صديقا جيدا"

علّنا نجد فيها مفهوما نرجوا من الله ألا ننساه

و ارجو أن نتذكر دائما:
"together we are strong"

اهداء أخير.. نهدى هذه المدونة الى الذين سيحبونها ... و أيضا الى الذين قد لا يحبونها .. لأننا - تماما كما الحقيقة -لا نحمل ضغينة لأحد.....