Tuesday, February 12, 2008

2 pix, 12 y. inbetween



بسم الله الرحمن الرحيم



اسمحولي الاول امسح التراب اللي ع اللي كي بورد

وثانيا اهني كل مصري على احلى كاس افريقي
وثالثا ابدأ الموضوع عشان متتخنقوش مني




مفكرتش في مرة تاخد صورة من نفس الزاوية اللي اتخدت منها صورة تانية اتصورت قبلها بسنين؟
هي فكره جديره بانها تكون فكرة سيريال كيلر بيحاول يقلد جرايم جاك السفاح مثلا في فيلم امريكاني بس ليه لاء
متيجي نجرب


هي صورة اتخدت في التسعينات ,تحديدا سنه 1996
في مكان انتوا تعرفوه كويس

اللي في الصورة طلبة في 6 طب وقتها يعني ممكن يكونوا دكاترة علينا دلوقتي عشان كده خبيت الوجوه وكمان بعتذرلهم جدااا

بالنسبة للصورة اللي صورتها معتقدش انها كانت من نفس الزاوية بالظبط بس لو كنت ظبتها ثانيه زياده غالبا كان صحابي هيقتلوني

وبعتذر لاخواتي على التشويه ده بس محبتش افرج صوركم لسته مليار بني ادم بس ,انتوا مقامكم احسن من كده



عايز اسمع بقى يا باشا كليكك الجميل على الصورة الاولانيه عشان تكبر وتبقى حلوة كده وتتفرج على الارقام اللي حاططها لسعادتك



1

لون الكليه كان فحلوقي_ لو في لون بالاسم ده اصلا_ او يمكن تكون مش هي دي الكليه ودي شوية تراب مكانها الله اعلم

المهم انها مختلفة تماما

واليافطه لا تعليق عليها



2

يفط التهنئه

صدق او لا تصدق كانت بتتعلق ايامها بردو

ومتيهألي لو رجعنا للكلية في العصر الفرعوني هنلاقي يفط عليها تهنئه من الدكتور حابي للدكتور امنمحات بيهنيه فيها على رئاسته لقسم التحنيط



3

ما شاء الله العربيات كانت بتركن جوه

حاليا صعب تلاقي مكان لرجلك عشان تركنها

وموديلات العربيات طبعا حكااااااااااايه تقلش واقفين في معرض دبي



4

ستايل طالب الطب

وششششششششششك

قميص من اللي بيقول عليه البعض فاسكوس ويحب البعض الاخر تسميته خنافس

طلبة كلاسيك لدرجة تخلي كونكريت وجوتشي يقفلوا محلاتهم ويبطلوا شغل

وكنت هموت وافرجكم على النضارات

بس انا واثق في خيالكم وعارف انكم هتتخيلوها صح

5

العمود ده بالذات من ساعة ما عرفت ان كان عليه السلة دي

وانا ندمان على كل يوم وقفته ادامه



6

نفس الوقفة بتاعة يوم الاربع

ta7t el kobry syndrome

متلازمة تحت الكوبري

واضح اننا وارثنها عن اجداد الاجداد

ومتهيألي بردو ان حمورابي كان بيقف مع حتشبسوت في نفس المكان



7

فراااااااااااااغ

صعب تلاقي المساحات الشاسعه دي في الصورة التانيه





تفتكروا يا شباب الدكاترة اللي اتصوروا سنه 96 دول جه في بالهم ان في واحد هيقف ويمسك تليفون من اللي بيقول الو ويحاول يصور صورة تحاكي صورتهم؟

طيب تفتكروا بعد 12 سنه كمان يعني سنه 2020 حد هيفكر يصور من نفس الزاوية؟

تفتكروا هيصور بايه؟ بساعته مثلا؟ ولا مجرد انه يدوس على زرار في نضارته؟

طيب تفتكروا الصورة اللي بعد 12 سنه دي هيكون في ايه بين اضلاعها الاربعه؟

ممكن ميكونش فيها كليه خالص؟ او يمكن يكون فيه واتغيرت زي دلوقتي كده

يمكن مثلا بقى لونها تركواز او ليلا او بوانتي ومحدش يسألني الالوان دي شكلها ايه

يا ترى عدد الطلبة اللي في الصورة هيبقى وقتها قد ايه؟

يا ترى الناس هتكون لابسه ايه؟

يا ترى هتبقى فيه يفط عليها تهنئه من دكتور تيمو لدكتور كابو بيهنيه على رئاسة قسم تقليم الاظافر؟



يا ترى .. ياترى ..يا ترى؟



6 comments:

bota said...

السلام عليكم

فكره تحفه اللي عملتها

مقارنه بين الاجيال

بس بجد اغرب حاجه ان صورتكم كلها بشر
وصورة الدكاتره الكبار مفيهاش غيرهم

ربنا يستر بعد كده

ربنا يوفقك

der Kaiser said...

اهاااااااااااا

فهمت انت كنت مصر تصورنا كدة لية

بكل امانة نقول لك:ظربة معلمية يا مصطفى..فكرة رائعه فى رأس أروع
كما كان من الممكن ان يقولها الشوالى !؟

لا لا..جديدة و مبتكرة

أحسنت يا مصطفى بجد

شق القمر said...

مرحى بعودة حضرتك وعودة روح المدونة ... ويارب على الدوام
اتمنى كمان تعيد مدونتيك د. مصطفى ان شاء الله
.....
بالنسبة لتوبيك حضرتك
فليه تحذف الوجه ... أظنها خبت على الصورة .... وعلى فكرة انتم اولاد يعنى محدش هيتناول صورتكم فى فوتوشوب والخوف اللى بيخلى البنات تلغى صورها من الشبكة الدولية
:))

ودائما افكارا لذيذة كعادتك ... ربنا يبارك
لكن فى جزئية اللبس حبيت استفسر ...... مين الناس اللى حضرتك جبت سيرتهم؟؟؟

:)

واتمنى نهاية طيبة لامتحانات راوندات النسا والولادة وبداية طيبة فى الجراحة ان شاء الله
بالتوفيييييق

Casper said...

هههههههههههههههههه

بالعكس يا رنا أنا أتفق مع مصطفى انه يخبى الوجوه

فى الصورة الأولى احتمال يكونو دكاترة عندنا دلوقتى فى قسم الجراحة وبحساب فارق السن يعنى رتبتهم دلوقتى مدرس أو أستاذ مساعد

فهيبقى شكلنا ايه لو دخلنالهم فى امتحان كلينيكال ولا شفوى

هنعتمد بقى انهم مايبقوش فاكرين كانو لابسين ايه يومها

وأعتقد ده حصل لأنهم أكييييييييييييد ضغطو على نفسهم ينسو شكل القمصان اللى كانو بيلبسوها أيامها

وأنا كنت مستغرب ازاااااااااااى الناس واخدة فكرة عن طلبة طب انهم معقدين مع ان اللى يقعد معانا بيفتكرنا فى تجارة انجليزى أو حتى آداب

دلوقتى عرفت السبب

أما عن اخفاء الوجوه فى الصورة التانية هى ضربة معلم عشان تبقى شبه الصورة الاولى بالظبط

:D

ماتكلمنيش عن النضارات يا مصطفى متخيل منظرها والله

على كده نضارتى فى وسطهم كانت هتبقى رجس من عمل الشيطان

:)

أما عن العمود , أنا كمان ندمت على العمود ده بالذات وخصوصااننا كنا مسميينه العمود المقدس

سبحان الله الواحد نظرته بتتغير لما يعرف تاريخ المكان

عود أحمد ومحمود وعلى وعبد العظيم وكل حاجة بموضوع أكثر من رائع

;)

شق القمر said...

هههههههه
تحليل منطقى د.أحمد
نورتوا المدونة من تانى
بالتوفييييق

Khaled Selim said...

يااااه
الصورة القديمة دي فعلاً فيها عبق التاريخ

ههههههه

بجد فكرة جميلة

وعلى رأيك يا ترى حد حيصور صورة تالتة كمان عشرين سنة مثلاً ؟؟