هرتلة , على مصطبة الشلة

هرتلة على مصطبة الشلة



ياااااااااااااااه , يومين راحة بعد ضغط امتحان الجراحة وما بعده من مناسبات اجتماعية كتير لينا بين عزاء وكتب كتاب لغاية ما الواحد جاله انفصال فى الشخصية
ده أقل مرض ييجى للواحد بعد يوم واحد يكون عندك فيه اتنين عزاء وواحد كتب كتاب مثلا

خلاص كده فاضل كتب كتاب واحد بس ولازم هناكل فيه طبعا ان شاء الله لأنه بيت معروف بالكرم

هييييييييييييييييييييييييييييييييييييييييييييييييييييه


قلت أستغل اليومين دول أكتب حاجة على لساننا كلنا وحاجة احنا حاسين بيها كجروب


فاضل يومين على الذكرى التالتة لرحلة الأقصر وأسوان 5/2


أحلى وأروع وأمتع رحلة طلعناها وأحلى رحلة وأحلى جروب ممكن الواحد يطلع معاه

الحقيقة ان الروابط بينا وبين أسوان بالذات جامدة جدا فمازالت فى رأينا كلنا هى أحلى مدينة رحناها شكلا وموضوعا وأهلا وناسا وجمال الجو وكل حاجة

مدينة قضينا فيها أحلى وقت ممكن لدرجة اننا بنحتفل بذكرى وجودنا فى المدينة دى بالذات


مدينة اللى حركت أكتر من واحد يعملو فيديوهات يخلدو اللحظات دى واللى كان نفسى أحط فيديو منهم اللى عمله واحد مننا بس للأسف مش عارف أوصل له خالص عشان أستأذنه


أسوان , اللى لما جه زميل الثانوى خريج الشرطة يحكيلى انه هيمسك هناك شجعته وقلتله انت هناك هتمسك فى أحلى مكان فى مصر , اوعى تسيبها


وقد كان وبقى لينا هناك الملازم الأول أحمد اللى اسمه يهد الجبل لأنه أبوه!!


وبقينا احنا اللى لسه طلبة نوصى على اللى نعرفه ورايح المدينة دى عشان يشيلهم على كفوف الراحة وينبسطو هناك , يمكن يشوفو هناك أيام حلوة زى اللى شفناها

وبصراحة الولد (أو الباشا بقى) عمره ما خيب ظننا أبدا , راجل بجد




على عكس الأقصر خاااااااااالص اللى ماعجبتناش كمدينة أبدا وكنا بنلاقى شوارعها مكسرة وطافح فى معظمها المجارى (عدا البر الغربى)


كنا مستغربين جدا ازاى المدينة اللى فيها سدس آثار العالم يكون اهتمام مجلس مدينتها كده


وازاى نقعد نقول مصر سبع تلاف سنة حضارة وأطول نهر فى العالم وأطول رئيس وزراء فى العالم وسايبين مدينة تقدر تصرف على 3 دول زى مصر من عائد السياحة بس بالمنظر ده


عملنا بالظبط زى بلدياتنا اللى لقى كنز , قال : كويس , فاضل الخريطة !


نهايته , اهى مجرد هرتلة وأتمنى ان رحلاتنا الحاية باذن الله تكون بنص حلاوة أسوان , كفاية علينا
يااااااااااارب

Casper