Tuesday, December 25, 2007

(1) طرقات على باب السعاده



محبط؟..تعبان؟؟..حزين؟
حاولت تفرح و ماقدرتش؟
هقوللك على نصيحه تمتد فى كذا حلقة ان شاء الله..يمكن تساعدك..و ابقى ادعيلنا لو نفعت !!

مصدرها؟
تجارب شخصية و بعض ما أتذكرة من محاضرات التنمية البشرية

أكيد طبعا هبقى بهرج لو قلت لك ان دة العلاج أو الحل السحرى !!

لكنها محاولة يا سيدى..و خيركم من يجود بما عندة !!



1:خد القرار..انسى اللى مضايقك

لكل شىء سكـون بعد فورتة....و كل عـيـن الى غمض و اغفاء
ألا تـرى الـيم تطغى فية موجته....تقطع الـقـلب من هم و بأسـاء
حتى اذا بلغت مجهودها..فنيت....من بعد جلجلة منها و ضوضاء

"الأبيات لابراهيم عبد القادر المازنى"

يبقى اول خطوة يا سيدى الفاضل هى انك تدرك تماما انه مهما كان السبب..و مهما كانت حالتك المعدنية..قصدى المعنوية..ففى النهاية كل حاجة بترجع لطبيعتها و بترجع لسكونها بأمر الله
و ان حزنك دة - مهما كان كبير و أيا كان سببة -فمصيرة الى زوال ان شاء الله

فاكر كلمات أغنية كنت بحبها جدا زمان..كان بيغنيها زين العمر..كان فيها

"سهار و مشور و انسى همومك..دور ع الأوقات الحلوى
قلبك هو اللى بيلومك..لو مرة ع الهم بتنوى
ما بعمرك تندم ع الماضى..عيش الحاضر فكرك فاضى"

يبقى نتفق يا صديقى العزيز ان الحزن و الاحباط و اليأس لا هم مطلوبين و لا هم الأساس

الأصل هو السعاده..و ربنا سبحانة و تعالى ان كان بيبتلينا فى وقت أو أوقات من حياتنا..دة فى حد ذاته مصدر للسعاده
لأنك فى الحالة دى بتبقى على يقين حقيقى ان الابتلاء دة مصدر للسعاده فى الأيام الجاية فى الدنيا..و كمان فى الآخره ان شاء الله
"ضاقت فلما استحكمت حلقاتها..فرجت....و كنت أظنها لا تفرج !!

انت عايز تقول اية ياعم ؟؟ صدعت دماغنا !! -
- باختصار شديد:أولى الخطوات :اليقين التام فى أن الحزن أو الضيق هو مرحلة مؤقته ان شاء الله
و حتى الألم اللى ممكن تحسة دة..أنت مثاب علية كمان ان شاء الله

هى دى على ما أظن و بتقديرى الشخصى المتواضع أولى و أصعب الخطوات فى طريق السعاده:اليقين فى الفرج

و انك تاخد بجد بجد القرار بأنك تخرج من نفق الحزن المنفر دة الى اشراقة شمس الأمل و التفاؤل..و خليك فاكر
"تفاؤلوا بالخير تجدوة"



يستكمل فيما بعد.......

5 comments:

dr_abotrika said...

ضاقت فلما استحكمت حلقاتها..فرجت....و كنت أظنها لا تفرج

انا فرحان عشان اول واحد برد علي اللمسه الفنيه الاولي ليك ياعم احمد

ودايما انا بستفيد بكلامك فعلا
الله يكرمك يارب

der Kaiser said...

الله يكرمك و يعزك يا عمرو
دة من ذوقك بس و الله

يلا بقى انت كمان..ورينا الهمه يا بطل

Casper said...

جميل جميل جميييييييييل

فكرة حلوة لموضوع متسلسل

وان كنت (عن نفسى) هاخد اللى هتكتبه من التجارب الشخصية لأنها أوقع وأفضل تأثيرا وده عشان أنا مش بقتنع بكلام التنمية البشرية فى كل حاجة

فكويس ان انت اللى هتكتبها عشان أسلوبك لوحده يشد الناس انها تكمل وتستنى الباقى

der Kaiser said...

جزيل الشكر ليك يا كاسبر
جرب التنمية البشرية يا صديقى العزيز..و صدقنى هتقتنع بيها جدا ان شاء الله

ربنا يوفقنا كلنا للخير ان شاء الله

Nothing`s worth said...

اوكي يبقى اتفقنا يبقى مبدئيا اليأس والحزن والاحباط مش هم الاساس هي حالات عارضه
مع اني من الناس المؤمنين بنظرية ال
rise and fall
في كل حاجه

بس معاك تماما في ان السعاده هي المفروض تكون الحاله النفسيه الاساسيه لانها على الاقل الحاله اللي انتا بتسعى توصلها او اللي عايزها يعني

مش عارف اقولك قد ايه الفكره عبقريه وانك تعملها حلقات اكثر عبقريه
وبالمناسبه انا هكون اول زبون عندك في الحلقات دي ان شاء الله
مانتا عارفني :)

جزاك الله خيرا دير كايزر