Thursday, December 27, 2007

تشيلسي و...السادات!!!

بحب تشيلسي.اه و بشجعه سواء كان الاول او العاشر. من غير تعصب ,بس بشجعه حتى من قبل ما تحصله الطفرة البترولية لما ابراهيموفيتش اشتراه.ماتقوليش ليه. اصل التشجيع دا حاجة مش منطقية خالص.ليه بتحب الفريق الفلاني او الرياضي الفلاني؟سؤال مفيش حد يقدر يرد عليه رد مقنع.و بعدين جه ماتش تشيلسي و الارسنال الاخير_وكان بقالي فترة كده مش بشوف ماتشات_وروحت اتفرج عند واحد صاحبي.وبدأ الماتش و كنت بقى كالعادة متحمس جدا و بشجع على الاخر و بعدين الاقي المدرب الصهيوني_بتاع تشيلسي للي مش عارف_طالل على الشاشة بوشه الاتم.والاقي نفسي اتقفلت كده و فترت.مش عارف مش عارف اهضمه مش مبسوط كده بوجوده.قولت معلش لقيت تيري بيزك و طالع من الملعب طب مين مكانه الصهيوني التاني بن حاييم و من اول ما وشه الفقر طل على الملعب وفى اول مشاركة ليه راح جالاس ضاحك عليه و زقه و حط الكورة جون.مش دي المشكلة المشكلة اني بدأت كده ازهق و اتقفل وبيني وبينكم بقيت محرج وانا باشجع الفريق.مش عارف اتعامل مع الوضع.ماهو كل شوية صورة المدرب وصورة الاعب.المهم في نهاية الماتش بعد ما ارسنال كسب لقيت نفسي باقول احسن و ماكونتش زعلان ان تشيلسي خسر ابدا.قعدت افكر في الحكاية دي و اقول طب ماهو ابراهيموفيتش يهودي و سبيلبيرج_المخرج_مثلا يهودي و ارد و اقول لا بس الاسرائيلي غير. الصهيوني غير.فعلا بجد ماعرفتش اعديها حاجة كده مالهاش تفسير زي كده تشجيع فريق معين.حاجة كده في دمك في تاريخك وفي قلبك بتقول لا.من بعد الماتش بقيت بتكسف حقيقي اقول اني باشجع تشيلسي ماكونتش واخد بالي يمكن بس بعد الماتش الوضع اختلف.طيب هاتقوللي قصة جميلة انت بقى عايز تقول ايه؟هاقولك يا سيدي لما قعدت افكر في الموضوع دا افتكرت كده حوار على قهوه مع صديق(هو عارف نفسه مش هاقول هو مين)قعد يقوللي اه والسادات بطل و المعاهدة تمام وانت يعني كنت عايزنا نقعد نحارب لحد دلوقت.و لقيت صديق تاني(برضه هو عارف نفسه ومش هاقول هو مين)بيصدق على كلامه!!!و استغربت جدا ..دا انا مش عارف اشجع الفريق اللي كنت بحبه جدا عشان كده صاحبه خد خط الصهينه..تيجي انت تقوللي و مالوه..نهادن و نعاهد و نطبع و نصهين بس معلش بلاش نحارب..اصل الحرب دمار و خراب ديار و شباب بيموت و نسوان تترمل وعيال تتيتم..طب و احنا عايشين ازاى ماهو الدمار و خراب الديار وموت الشباب _وهو حي كمان_و ترمل النسوان و تيتيم العيال حاصل اهوه من غير حرب ولا دياولو.تقوللي الحرب بتخرب الاقتصاد و تعيش البلد كلها في ازمة.دا على اساس ان الاقتصاد جامد والازمات كلها محلولة؟!!!طب ايه رأيك ان اقتصادنا ايام الحرب كان احسن من دلوقت و احنا عال العال و ولا حرب ولا حاجة!!تقوللي طب و ايه الفرق ماهي خربانة كده، وكده برضه خربانة..اقوللك فرق كبير قوي انك تعيش جعان و عريان بس معاك كرامتك احسن ما تعيش شبعان و مكسي من غير كرامة..فما بالك بقى انك عايش جعان و عريان و من غير كرامة برضة..!!!يا اخوانا و الله ماهو هبل ولا يعني شعارات واحنا جامدين و هنحطم اسرائيل و معاها امريكا كمان و كلام احلام مالوش دعوة بالواقع. كل اللي باقوله عيب نقول على الغلط صح و نقول ماكانش في غير كده. لا كان فيه بس الارادة اللي ضعيفة...قوي.كان فيه اكتر بس سقف احلام القيادة كان واطي...قوي.وبعدين دلوقت تطلع علينا القيادة الجديدة بصورة تقطر عارا و خزيا.اكيد كلكم شوفتوا الصورة اللي ايهود اولمرت طالع فيها_بوشه الاتم برضه_مع قيادتنا الرشيدة الحكيمة_كما يقال و العهدة على الراوي_وهما حاطين ايديهم على كتف بعض و بيضحكوا و منشكحين جدا.تقوللي و المعاهدة مالها ؟مال الصورة دي بموضوعنا ؟ماهي الحكاية مقدمات و نتائج.المقدمات الفلانية توصلنا للنتائج العلانية!!وللا انتو رأيكوا ايييييييييييييييييييه؟
نكتفي بهذا القدر و تصبحوا على سلام.

11 comments:

Gebro said...

ايه يا قدس النشاط ده موضوعين فى يومين..ماشى يا عمى..مبروك عليكم يا رجالة المدونة الجديدة.زربنا يخليكم لبعض..طبعا انا ول واحد داخل يعلق على موضوعك عشان انتا عارف انى اكبر مشجعى تشيلسى فى الكليةويمكن فى البلد كلها..بص ياد انا زيك والله ساعات بتحرج من تشيلسى بعد مالاخ جرانت مسكها وتال بن حاييم بس بارده بحبها عارف زى قيادتنا الرشيدة بالظبط مش راضى عنها وطبعا مش عاجبنى صورة اولمرت بس فى الاخر انا مصرى هتخلى عن جنسيتى يعنى..الموضوع انتماء يا قدس ثم انك ياد متكلمتش عن ليفربول اللى بتشجعه بارده بالرغم ان جيليت يهودى وعندهم لعيب اسرائيلى بارده"يوسى بنايون"..سيبك انتا المهم شفت ماتش تشيلسى النهاردة مش بذمتك اتحرق دمك على طرد اشلى كول وضربة الجزاء الظلم لا والحلاق جرانت بيطلع شيفا وهو بيلعب ماتش عمره..اه يانى مافيش فايدة اللى فيه داء مش بيبطله..تشيلساوى وارسنلاوى للابد

msmoe said...

عمارة باشا .والله منورنا.ياسيدي انا مش زعلان من اليهودي ان زعلان من الاسرائيلي الصهيوني.لفربول جاب لعيب صهيوني .ماشي...لكن تشيلسي واخد خط الصهينة مدرب و اتنين لعيبة و فاضل علم اسرائيل.اما عن مصر و القيادة الرشيدة...فلو القيادة دي هي الممثل الحقيقي لمصر انا مش عايز ابقى مصري ياعم.بس كلنا عارفين ان القيادة و الحكومة و شلة الابن و اصدقاء الابن حاجة و مصر حاجة تانية خااااااااااااااالص..وللا ايييييييه؟
عموما يا مان نورتنا .

Nothing`s worth said...

اولا احييك يا قدس
ثانيا انا الصديق بتاع القهوة وديعو هو اللي صدق على كلامي وبعد كده قول الاسامي عادي احنا مش بنكتب في اخبار اليوم
على فكره انا شايف مبدئيا انك وقعت في غلطه لذيذه جدا
انتا بتقول ان ده رايك انك بتحب تشيلسي بالرغم من ان الناس شايفه فيه كذا وكذا وكذا وفي نفس الوقت بتلوم عليا حبي للسادات مع انك شايف فيه كذا وكذا وكذا مع اني قلتلك مليون مرة ان ده رأيي
وانتا يومها كل تحاملك على السادات عشان خد قرار المعاهده وقلتلي ليه ياخد قرار عن الشعب مع ان فيه غيره اللي نحى محمد نجيب وخد قرار سحب القوات الدولية وصعد الامور مع اسرائيل وخد قرار تعين المشير عامر وخد قرار وقف اطلاق النار والانسحاب وفيه غيره كمان اللي خد قرار الاشتراك في حرب الخليج الاولى وكل دي قرارات مطلبهاش الشعب
وبعدين سيبك بقى من المناقشات الناصريه السداتيه اللي لا تودي ولا تجيب دي خلاص مبقلهاش لازمه
الموضوع كله انك بتحب تشيلسي جدا رغم ابراهاموفيتش واليهود الجداد اللي فيه
ليك كل الاحترام يا سيدي ده رأيك انشالله لو شجعت صفط اللبن حتى
بس بجد انا مبسوط بنشاطك
يلا عايزين نقرالك موضوع كل يوم
بالمناسبة انتا رجعت من السنيما امتى؟
:D

Musketeer said...

This leads us to the confusing question which to what extend u can be rational in your judgment which is really hard like when an attack happen in america and then u find ur self sad 4 civilians and feelind that they feel like u the threat of losing life,anyhow i love Chelsea too.

msmoe said...

مصطفى باشا.اولاحكاية الاسامي و اخبار اليوم وكده مش بخبي يعني ولا حاجة هو بس اسلوب في التعريض عليك وعلى الباشا التاني.
ثانيا انا مش ناصري ولا حاجة ومش مناقشة سداتية ناصرية دا انا فتحت الموضوع دا لأن احنا عايشين اثاره لحد دلوقت.و بالمثل اللي احنا عايشين فيه دلوقت هيحددحياة الاجيال اللي جاية شكلها ايه. هي استفادة من عبر التاريخ.فلما تبقى انتا شايف ان المعاهدة_بشكلها النهائي مش من حيث المبدأ_صح تبقى انتا حامل لافكار و ثقافة معينة انا شايف انها هتودينا في داهية.
سلامي ليك واحترامي لفكرك رغم كل شئ.

der Kaiser said...

الى نادى تشيلسى:

"بين حبى ليك و كرهى ليك خيط..رفيع"

موضوع جيد

Anonymous said...

بصراحة ياباشا ده أول موضوع شدنى انى ارد عليه وهاقولك رأيى بصراحة
أولا أنا مش عارف ايه حكاية تشجيع تشيلسى اللى طلعلى فيها نص الشباب اليومين دول مع ان تريخه لايساوى تاريخ نادى ليدز يونايتد الموجود حاليا فى الدرجة التانية الانجليزية
ولكنها الأموال اللى رفعت تشيلسى للسماء و القت بليدز فى غياهب الدرجة التانية
ثانيا ايه دخل الديانة فى لعب الكورةاشمعنى انت معجب برونالدينيو و كاره يوسى بنايون مع ان الاتنين نفس المركز ونفس التأثير على فرقهم مع فارق المهارات لصالح رونالدينيو
ولا عشان بنايون اسرائيلى يهودى
بص ياباشا المفروض لا دخل للدين فى الكرة لان لو دخلناه فى الكرة يبقى الأولى ان احنا ما نعجبش بأى لعيب من دول لانهم ببساطة شوية كفرة وطبعا أى اعجاب بأى لاعب يدخل ضمن المحبة لغير المسلمين وده منهى عنه فى الدين يا ريس
ثالثا جزئية الرئيس السادات انا ما ركزتش فى قرائتها اد كده و ان كان انا استشفيت انها بتتكلم عن زيارة الرئيس السادات للقدس و رأيك فيها
موضوع حلو واتمنى الاستمرار

dr_abotrika said...

اهلاااااااااااااااااا
الموضوع اياه من جديد...علي فكره انا افتكرت الموقف كان في القهوه
وبحترم رايك جدا يا عم محمد وكمان بحيي مصطفي علي رأيه..ويومها كنت محتار بين وجهتي النظر جدا علي الرغم من اني شخصيا احب السادات...ولكن الراجل اجتهد يا محمد..يعني مفيش حد مبيغلطش
والله لو كان اخطأ فليرحمه الله
ولو كان اصاب ايضا فهو رجل في ذمه الله واليه امره
وبعدين احنا المفروض ننسي الماضي ونشوف مستقبلنا عامل ازاي
ونرجع للكوره
انا ايضا كنت احب تشيلسي وللحق هم اتظلموا في ماتش استون فيلا بطرد اشلي كول لان الكوره مجت في ايده

وتشكر يا محمد علي المواضيع المتميزه
انا بعتبرك فاكهه البلوج سلااااااااااام

msmoe said...

عزيزي دافيد...
اسمحلي ارد على حاجتين.اولا انا قلت اني باشجع تشيلسي من قبل الطفرة البترولية _الفلوس يعني_و كمان عارف ان مالوش تاريخ وانا قلت ان التشجيع دا شئ غريب و مش دايما ممكن تبريره او بالاحرى غالبا.
ثانيا بقى اسمحلي اقولك انك ماخدتش بالك ياباشا لاني مش بتكلم عن الدين...في فرق بين اليهودي و الصهيوني.قد اتقبل اليهودي على مضض و لكني _زي ما قلت_مش قادر اتقبل الصهيوني_و دي مش ديانة_قلت ان مش عارف اهضمه و دي حاجة مش اختيارية انت كده بتحس انك مش قادر تتعامل معاه.تعرف لما ببص في سحنة اي واحد منهم سواء جرانت او بن حاييم بحس كده انه لسه قاتل اتنين فلسطنيين وجي قبل الماتش وشه كده مكتوب عليه او يمكن بيتهيألي.
في النهاية لك تحياتي.

der Kaiser said...

أحب اعلن عن تأييدى لمفهوم قدوس
انا لا أعترض على من هو"يهودى"بل اكرة كل ما هو صهيونى محتل غاصب
تحياتى للفهم السليم يا قدوس
و دة مش غريب عليك يا أستاذ

David_Charle_Samhon said...

أنا معاك فى حتة ان فيه فرق شاسع بين اليهودى والصهيونى
لان اليهودية ديانة والصهيونية فكر ولاتتقيد بدين
بس انت مافهمتش انا قصدى ايه
احنا بنتفرج على كورة وعلى لعب بدون دين أو سياسة
ممكن أكون كاره لاعب معين بس ده ما يمنعش انى اٌول انه كفء طالما هو كذلك
و بعدين هو صهيونى واسرائيلى ولما بتشوفه بتحس بانه قاتل اطفال فلسطين ماشى بس فى نفس الوقت ماهوش قاعد بيدرب فرقته وهو ماسك ار بى جيه مثلا
لكن لو بين أى شئ بيدل على فكره أو عقيدته العدوانية الدموية بشكل أو بآخر .. يبقى من الآخر مكانه صندوق الزبالة غير مأسوف عليه زى بعض الصهاينة فى الدورى التركى وحوادثهم التى لاتنتهى فى تركيا وخاصة مع اللاعبين المصريين
كلمة أخيرة الصهاينة مش فى اسرائيل فقط دول فى كل حتة فى الدنيا حتى فى اوروبا نفسها
ارجو انك تكون فهمت كلامى
مع تحياتى لك