Sunday, December 30, 2007

روايات و روائيون

عندما رأيت اسم جورج اورويل في موضوع كيمو الاسبق جاءتني فكرة هذا الموضوع.
هذه قائمة بما سأتذكره من افضل الاعمال الروائية التي قرأتها _يعني تجربة شخصية_و التي اوصي بقراءتها جدا. اعلم ان الوقت ضيق للجميع ولكن من يعلم ربما...
1_مسرحيات شكسبير:و منها هاملت،ماكبث،عطيل ،تاجر البندقية،روميو وجولييت و الملك لير
وان كانت مسرحيات و لكن بعد ترجمتها اصبحت في شكل الرواية.و طبعا شكسبير غني عن التعريف لذا لن اعقب.شخصيا اعتبر انه الاول(نمرة واحد يعني)ت.
2_روايتا البؤساء و احدب نوتردام لفيكتور هوجو
وهو الاروع و الامتع وعلامة الادب الفرنسي .ابحث عن نسخة كبيرة لان متعة فكتور هوجو في وصفه الرائع و الذي يختزل كثيرا في النسخ الصغيرة(يعني اللي زي بتاعت ماما سوزان و الهلال )ت
3_الجريمة و العقاب للروسي ديستويفسكي:
افضل من كتب في تحليل الشخصيات و نفسياتها.يسلك بك في دهاليز العقل في رحلة لا يمكن ان تجدها عند غيره(حاسب اوعى تتوه منه)
4_روايتا 1984ومزرعة الحيوان للانجليزي العبقري جورج اورويل:
يجب ان اقول ان رواية 1984 هي روايتي المفضلة.رواية عبقرية بحق ولكن احذر فقد تصاب باكتئاب حاد بعد الانتهاء منها (ودا اللي حصل معايا بالمناسبة)وايضا اقرأ بتمهل لان الرواية صعبة الفهم(يعني ممكن تقرا الصفحة مرتين وتلاتة لحد ما تفهم هو عايز يقول ايه بالظبط)
5_ذهب مع الريح للامريكية مرجريت ميتشل:
تحفة وحيدة .حيث لم تكتب الكاتبة شيئا مميزا غيرها.ولكن هذه الرواية الوحيدة كانت اكثر من كافية لتضعها على القمة.
6_جين اير للانجليزية شارلوت برونتي:
رواية كلاسيكية جدا.رومانسية جدا وتتميز بنهاية غير مأساوية (يعني مش هاتزعل في اخرها)جميلة جدا فعلا.
7_وداعا ايه السلاح للامريكي ارنست همنجواي:
قصة حب ملتهبة في وسط الاحداث الجسام .في وسط نيران الحرب العالمية الثانية.و...بس..كفاية كده.
8_قصص الامريكي ادجار الان بو:
هي ليست روايات بالمعنى المفهوم و لكن اذكرها هنا لاتها من نوع خاص .قصص رعب .
وطبعا ملك قصص الرعب هو ستيفن كينج ولكن بو له طابع خاص . مذاق مختلف ولكي افسر لك اكتفي بالقول انه كان مختلا عقليا _سايكو يعني_ ولذلك تجد اثار عقله المريض في كتاباته ومن افضلها سقوط منزل اشر و قناع الموت الاحمر.
9_الشاعر للفرنسي ادمون روستان او الاسم الاخر سيرانو دي برجراك:
ابحث عن نسخة بترجمة مصطفى لطفي المنفلوطي فهي افضل ترجمة.رواية رومانسية شاعرية جدا جدا جدا.احذرك...اقرأ الفصل الاخير لوحدك(يعني اقفل على نفسك وانتا بتقراه)لانك ستبكي بغزارة ان كان عندك احساس (اه عيطت ...لا اتهريت من العياط في اخر الرواية)حقيقي هاتدعيلي.
10_طبعا في العربي الافضل هو نجيب محفوظ و لكن ارشح لك رواية لعباس العقاد اسمها سارة_اه الرواية اسمها سارة_:
.دائما العقاد يكتب بعقله و لكن في هذه الرواية بالذات تحس ان هناك جزءا كبيرا من قلبه و احساسه فيها وهو ما قد يشكل دليلا انه كان يكتب عن سارة التي كان يحبها في الحقيقية.
طبعا هناك الكثير و الكثير و لكن المجال لا يتسع و اظن شخصيا ان هذه المجموعة من افضل ما كتب فعلا.
اسف للاطالة.و.....تصبحوا على خييييييير.

9 comments:

شق القمر said...

تدوينة طيبة دكتور
تسلم على نصيحتك
هذا ما نريد فعلا
غالبا عندما اطلب رواية اسأل بأى رواية حسب الخبرة ولا أسأل باسم معين
ان شاء الله أبحث فيما كتبت
خصوصا الفرنسية المترجمة بواسطة المنفلوطى
بحق اؤيدك بما قرأته من بعض ما كتبت عنه
وبحق أسعد كثيرا لان ارى او اقرا عن شبابنا القراء
بالتوفيييييييق

der Kaiser said...

بوست رائع من"الأستاذ" و ان كان لى ان أضيف ولو شىء بسيط الى قائمتك الرائعه

"دكتور جيكل و مستر هايد"
ل روبرت لويس ستيفنسون

و حرى بى الاشارة الى رائعه العقاد"ساره"حقا أتانى احساسك يا قدوس يبدو ان العقاد كتب عن قصة حبة الشخصية

شكرا لأستاذنا على موضوعه القيم

dr_abotrika said...

تشكر علي الروايات
يا محمد باشا

dr hatooma said...

أبدعت وأقنعت يا قدس
الحمد لله الكثير مما ذكرت قرأته
وأحببت أن أضيف روايتين لتشالرز ديكينز
وهما الأمال الكبرى
وديفيد كوبر فيلد

وأحببت أن أحظرالمتفائلين وأصحاب القلوب النضره
إياكم ورواية دكتور زيفاجو
كنت أنتحر منها
الحمد لله أنك لم تذكرها يا قدس
أراكم على خير أيها الأحباب

Nothing`s worth said...

ما شاء الله يا قدس فكره مميزة
جزاك الله خيرا
واهنيك على كل اختياراتك
انا على فكره شالو جدا في حكاية الادب الغربي دي ومن كل اللي انتا كتبته يمكن ماقرتش غير احدب نوترودام
وبأيد خليفة في اضافته لدكتور جيكل مستر هايد لاني من عشاق الروايه دي وسبحان الله من فتره كده كنت متأثر بيها جدا وكتبت حاجه عنها كده في بلوج الحواديت

احب كمان اضيف رواية عجبتني جدا
هو انا قريتها مترجمه هي راسبوتين
وكمان قريت جزء من الحرب والسلام وجزء من انا كارنينا بتوع تولستوي
وبصراحه منصحش بالادب الروسي اساسا

تسلم يا محمد على الموضوع الجامد ده

msmoe said...

شق القمر ...
يسعدني ان افيد ولو بالقليل.
و بالنسبة لاختيارك...فأنا متأكد ان هذه الرواية بالذات ستعجبك جدا جدا.و لكن كما قلت ترجمة المنفلوطي ضرورية لأن كاتب الرواية شاعر اصلا.و لذلك يحتاج الى اديب ثقيل مثل المنفلوطي ليترجم الشعر بدون اختزال.
خلي...اضافة قيمة.بس الرواية خفيفة شوية و لكنها طبعا مميزة.
حااااااااتم...
ايه النور دا؟
بالنسبة لتشارلز ديكنز...فافضل رواياته بدون خلاف هي قصة مدينتين اقراها اذا لم تكن فعلت ..لن تندم.
اما عن رواية دكتور زيفاجو فوالله جت في بالي و كنت على وشك اكتبها بس ربنا ما قدرش.سبحان الله..
صاصا .حبيب قلبي...
احب انوه ان راسبوتين قصة حقيقية.كان في فعلا شخص مرعب اسمه راسبوتين هو الموجود في الرواية.اما حكاية الادب الروسي،فلو قريت لدستويفسكي اي حاجة هتبدأ تفكر تاني .انا متأكد من الكلام دا.

Casper said...

موضوع رااااااااااااااااااااااائع يا قدس

وعندك حق رواية 1984 دى تعتبر الرواية الأولى فعلا لأنها كفكرة عامة كانت بتصور ازاى المجتمع هيبقى حاله لو بقى كل واحد متراقب فى أقواله وأفعاله فى المستقبل (اللى كان بالنسبة لأورويل سنة 1984 لأنه كتبها سنة 1948)

والدليل انها رواية رهيبة انها اتمنعت فى دول كتير زى روسيا وغيرها


******

دكتور جيكل ومستر هايد عندى يا خليفة وتحت أمرك

******

عاصم كان جايب نسخ أونلاين من معظم الروايات دى هبقى أجيبلك لينكاتها يا قدس وتحطها فى البوست ده عشان يبقى موضوع متكامل

something like love said...

طبعا بضم صوتى لكل من قال ان رواية دكتور جيكل ومستر هايد بردوا رواية جميلة وتستحق ان تضاف الى موضوعك المميز

بس احسن ماورد فيهم من وجهه نظرى الخاصة

او اللى بيعجبنى جدا ولا امل قراءته
روايه شارلوت برونتى

الجريمة و العقاب ل ديستويفسكي

وبالطبع احدب نوتردام لفيكتور هوجو

بجد دول التحف بتوع المجموعة

وان كانوا كلهم يعدوا من امثلة لاجمل ماكتب

شكرا على مااوردت من نماذج جميلة يادكتور

der Kaiser said...

الكلام حول دستويفسكى يا قدوس رائع جدا
بس الاسعار غالية بزياده فعلا

و يا ريت لو حد يدلنى على ترجمة محترمة ل دون كيشوت..بجد عايز اقرا الرواية مش مجرد ان الراجل حارب طواحين الهوا و الكلام دة !!

ربنا يكرمك يا كيمو و يخليك لينا..احنا اللى تحت امرك يا باشا