Thursday, December 27, 2007

دفـاعــا عـنــا

تأثرا بمقال:شباب عاوز الحرق!
لجارى العزيز الكاتب والطبيب د.أحمد خالد توفيق



دفـاعــا عـنــا



فى مرة جرب كده وروح لشيخ وقور عليه علامات التقوى واسأله: يا عم الحاج , ايه رأيك فى شباب اليومين دول؟

هتلقيه أرغى وأزبد وطار الوقار من على وجهه ومش بعيد دقنه تقع ويصرخ فيك: شباب تافه جاهل وقليل الادب سافل شهوااااااااااااااااااااااااانى

قول له بالراحة يا عم الحاج مش عايزين سكتة قلبية من مجرد سؤال. الشباب الشهوانى ده يا سعادة الباشا ممثل الجيل السابق وما قبله انتو اللى خليتوه شهوانى لأنكو ببساطة حرمتوه من أبسط الحقوق اللى بيمارسها أى قط فى مقلب الزبالة : المسكن والزواج!


واديتوله سفينة أكل السوس كل لوح منها والمسامير فكت وصدت وطالبتوه انه يمشى بالسفينة دى فى وسط البحر بين الدول , فبص حواليه لقى البوارج وحاملات الطائرات فسأل باستغراب: أمال كنتو بتعملو ايه وانتو ماسكين السفينة دى؟؟

فاتهمتوه انه شباب كسول وعايز كل حاجة تيجى سهلة !

حتى الاعلام , تحس ان فيه اجماع بين وسائل الاعلام المختلفة ان مصر ابتليت بألعن جيل من الشباب فى العالم كله ونسى الاعلام ان هو نفسه اللى قدم للشباب ده الكثيروالكثيييييييييييييير من هيفاء وبوسى سمير وأخواتهن

فى الحقيقة احنا الشباب مزنوقين بين نوعين من الصحافة , صحافة موالسة لأبعد الحدود تعلن هى عن زيادة الأسعار فى كذا وكذا وبعدين تبارك الخطوة الجبارة دى اللى اتأخرت عقود

تعظم فى الاشتراكية فى عهد عبد الناصر وتلعن أبوها فى عصر السادات.

وصحافة تانية معارضة لمجرد المعارضة فقط بتسلب الشباب حاجات كتير بيفخرو بيها من غير ما تحس. ولولا خوفهم النسبى من النظام الحالى كانو قالوا ان المصريين ماعبروش قناة السويس فى حرب أكتوبر , لقد تحركت القناة بضعة كيلومترات الى الغرب !

يخرج علينا التليفزيون فى برنامج على هيئة مذيعة حاطة على شعرها ازازة ماء أكسجين كاملة وعلى وشها أطنان من المساحيق خلاها أشبه بخباز فرن العيش بعد ما يغربل الدقيق وبتسأل الشباب مين هو وزير (التوابع المضادة) الحالى أو وزير (التعاون الاعلامى التخطيطى) ومايردش حد فتصرخ فينا الصحف ياريت الشباب يهتم بعقله زى ما بيهتم بالجيل اللى بيحطه على راسه...

ماليش رد على دى غير بجزء من رواية جورج أورويل الرائعة واسمها (1984) لما البطل كان بيسأل حبيبته (هل كان الحزب فى حرب مع ايستاسيا أولا أم كان فى حرب مع أوراسيا؟) تعليق أورويل نفسه قال ان البطلة ماهتمتش أصلا (لأنها لا ترى فارقا بين هراء وآخر)

بالظبط كده , الشباب برضه مش مهتم ومش هيهتم لأنه مش شايف فرق (بين هراء وآخر) هو ماخترش الوزير عشان يبقى مطالب انه يعرف اسمه ومش عارف مميزات ده عن اللى قبله

اسمحلو للشباب انه يختارهم وبعدين انصبوله المشانق لو معرفش

نفس الأمر ينطبق عالأسئلة من نوعية (متى انتهى حكم مملكة الأنباط) و (ما طول نهر الميسيسيبى) وغيرها من ثقافة الكلمات المتقاطعة وزى ما بنقول عليها فى شلتنا (المعلومات الفاشلة) لأن الثقافة تعريفها فى أى معجم : هى استخدام ما تملك من معلومات فى تكوين مفهوم متكامل عن العالم وكيفية التعامل معه


يسألنى البعض -حلوة البعض دى- يعنى انت قصدك ان الشباب اليومين دول ملايكة؟؟

هقول لأ مش ملايكة , ومش شياطين برضه. لكن كل الحاجات دى - وحاجات تانية مش لازم نقولها دلوقتى عشان بلاط الحبس بيكون ساقع فى الفترة دى- هى اللى ممكن تخليهم شياطين

وأنا كمان بتنرفز لما أشوف شباب روش طحن بيقول (أصل احنا مش لاقيين السيمبول -الرمز- اللى نتلم حواليه عشان نكون أكتيف) !

أحمد ربنا كتييييييير ان مفيش رمز زى سعد زغلول مثلا يتلموا حواليه والا كانو هيمشو وراه يهتفوا:

تعيش مصر كوووووووووووووول ومستقلة
!

20 comments:

last knight said...

الله ينور عليك يا أبو حميد
----------------
فعلا هي سلسلة جيل بيسلم جيل
والجيل اللي قبلنا استنى
عايش في نشوة نصر أكتوبر
ونسى أو تناسى
انه لازم يشتغل ويتطور علشان يواكب العالم من حواليه
ودلوقت بيعيبوا على جيلنا
طبعا كلنا نعرف السبعينات والتمانينات كانت فترة عاملة ازاي
Heapes ... beatles
والموضات الغريبة
جيلنا ما جابش جديد... نفس الوضع
بس زاد عليه الانترنت والفضائيات
---------------
عموما احنا برده علينا مسؤوليات كتير
لو حضرت راوند الجراحة يوم الدكتور أشرف
لما شرح
medical ethics
ها تحس ان فعلا البلد محتاجة لينا كلنا
الشباب قبل الشيوخ
-------------
ويا ريت هما يسلموا الراية لينا ويشوفوا
الجيل اللي مش عاجب ده هيعمل ايه
-------------
تحياتي ليك يا أبو حميد
and for the whole eleven

Musketeer said...

This is true and it is not only youth are targeted it is a whole nation who mustn't believe in her abilities and as youth considered the future so even the hope of a better tomorrow had to be stolen from u even denyind your national achievments whatever were they and as u said passind the suez canal ,it is a whole cruasde & we r just a part in it ,thanks to u and to the wonderful author Dr.Ahmed Khaled Tawfik.thanks.

Nothing`s worth said...

جميل اوي اوي يا احمد
وفي وقته كمان
كل يوم بنقرا عن الشباب اللي بيغرقوا على السواحل الاوروبيه وبتغرق معاهم احلامهم انهم يعيشوا عيشه احسن من اللي عايشنها هنا ده لو كانوا هنا عايشين اساسا

بس انا كنت عايز استبعد حكاية المؤامرة في الموضوع
بغض النظر احنا تارجتيد ولا مش تارجتيد زي ما بيقول جيمي بس المنطق بيقول انك لو ماشي في الشارع و لقيتك في سكتك طوبة متسالش مين اللي رماها ولا هي اترمت بقصد ولا لاءالمنطق بيقول انك تفكر تعديها ولو اتكعبلت فيها مرة تاخد بالك بعد كده وانتا ماشي
المثل العبقري بيقولك امشي عدل يحتار عدوك فيك

اه الشباب مغلوب على امره في حاجات كتيييييييييير بس بردو لو فكر هيعدي حاجات كتير وبردو فيه اللي بيقتل تفكيره بس هو بردو ممكن يصر انه يفكر

مشكور يا احمد انتا ودكتور احمد :)

شق القمر said...

السلام عليكم ورحمة الله تعالى وبركاته
تحية طيبة لكم جميعا أهل المدونة وضيوفها
تحية خاصة لدكتور أحمد خالد توفيق
فعلا مع أول قراءتى للمقال حسيت انه بألسنتنا كلنا
بس الأكيد اننا برده واقفين جامد
وف نفس الوقت مش قادرين ناخد منهم الراية
اختيار موفق كاسبر تبارك الله

der Kaiser said...

شخصيا..أظن أن هذا الجيل سيكون مميز و مبدع ان شاء الله

دة رأيى الشخصى..و انا أكرة نظرية المؤامرة بشكل لا يمكن وصفه

لا توجد مؤامرات..هناك ظروف..فشل..عدم قدرة على مواكبة تطور عالمى مذهل ..هناك كل شىء..و لا وجود للمؤامرات

مقال جيد..طرح رائع..يستحق الشكر بالتأكيد

something like love said...

اولا ارق تحياتى ل د/احمد خالد توفيق

وثانيا بالطبع ل د/ احمد

فعلا المقال معبر وصريح جدا

احوال الشباب كده ومبتتغيرش لكن

احنا محتاجين بس حد يفهمنا ك جيل
ومحدش طبعا من الجيل القديم يقدر ينكر انه فى بعض الاحوال

اما يتحط فى مشكلة بيرجع يقول لنفسه
وهو لوحده الله يكون فى عون الشباب لما احنا كده

هم يعملو ايه فى بداية حياتهم

انا فعلا من واقع شايفاه بسمع من الجيل اللى يسبقنا كلام يدل على تعاطفهم الخفى لينا كجيل

يعنى عن احدهم قالها بمنتهى الصراحة انتوا جيل غلبان عايز يبدأ من حيث انتهى الاباء مش من الصفر زينا
مينفعش لان الحياة بقى ايقاعها سريع جدا على ان اى شاب يبدأ من الصفر ويتوقع نجاح مبهر مهما كان تعليمه

اللى انا حساه فعلا ان جيلنا بدون تعصب يعنى يتمتع بذكاء كبير لم يتم استغلاله بعد
يارب بس ييجى وقت ونعرف نستغل الذكاء ده قبل مايحصله
disuse atrophy

مقال جامد يادكتور
منتظرين المزيد من المقالات الحلوة

تحياتى وسلامى

dr_abotrika said...

مين اللي قال ان الشباب مش شياطين
امال تفسر بايه الابتسامه الشريره بتاعتي
(هع..هع..هع)

Anonymous said...

موضوعك جامد يا كيمو بجد انت اتكيت على الجرح زى ما بيقولو ةانت عايز رايى احنا قصدى الاجيال الجديدة يعنى احسن من اى جيل فات ودة رايى لكن الموضوعية بتقول انك لما تحب تقارن حد بحد حطة فنفس الظروف وبعدين احكم علية هم جايين يحسبونا بعد ما خربت كانو حسبو نفسهم هم الاول احنا نعتبر حصاد اعمالهم فدنيتنا دى ياكيمو لازم حد هو اللى يحاسب على الطربيزة زى ما بيقولو والاجيال الجديدة هم الللى بيدفعو للاسف معلش انا طولت عليك بس بجد موضوعك جامد وعايزين فعلا نعد نتناقش فية سلامى لكل الاليفنز الشلة اللى زى العسل وسلامى لديعو وقلة يخف عليا شوية

zi.One said...

الله ينور يا احمد

اتكلمت بصوتنا كلنا

تسلم يا جميل

msmoe said...

هي صحيح الظروف صعبة بس ممكن ننظر لحالتنا بنوع من الايجابية .يعني ممكن نفكر كالاتي وجودنا في حالة صعبة قوي يعطينا الفرصة في احداث تغيير اكبر.ماهو ياباشا ربنا بيحاسبك انتا مشيت قد ايه مش وصلت فين.
تحياتي لك و لمواضيعك المميزة.حقيقي بحب اقرالك يا كيمو. استمر..

David_Charle_Samhon said...

يا باشا موضوع قى الجول بدون شك
واتكلمت عن شباب اليومين دول بنظرة المفكر د/أحمد خالد توفيق
بس أحب أقول حاجة
الناظر لأحوال الشباب بتاعنل يشعر معه انه ميئوس منه
تعالى شوف تفكير كل شاب وطموحه وأحلامه و فى نفس الوقت شوف تفاعله مع الطموح والأحلام
هتلاقى تناقض عجيب
يعنى كل شاب يحلم انه يتجوز ويكون بيت وأسرة ويعيش فى مستوى ولا الملوك
وشوف بيعمل ايه علشان يحقق الحلم ده
هتلاقى يا اما قاعدين على القهاوى منتظرين الوظيفة أوان كان عنده وظيفة بتجيب له دخل غير كاف يدور على شغلانة تانية وغالبا لا تتفق وتعليمه أو تكون فى سكة الحرام أو يحاول يسافر للخارج من أجل حلم الثراء السريع لاوروبا أو الخليج وقد يلجأ لوسائل غير المشروعة وادينا شفنا اللى بيغرقوا قدام سواحل ايطاليا و اليونان أو بيتخطفوا فى الأردن وسوريا الى آخره من هذه المهازل
كل ده واقولك شبابنا معذور لان من بعد حرب 73 حصلت تغيرات اجتماعية وأخلاقية رهيبة منها اتساع الهوة بين الطبقات وبعضها بقى الشخص بيبص لجاره يلاقى عنده التليفزيون والفيديو والتلاجة والبوتاجاز وهو يادوب عنده تليفزيون قديم أيضا التشجيع اللا محدود لعمل المرأة مما خلق فراغا داخل البيت فلم تعد الأمهات متفرغة للابناء ولم يجد الأبناء الصدر الحنون لمشاكلهم فاتجهوا لطريق الانحراف بكل أشكاله أيضا أهم سبب هو البعد عن الدين و القيم الاسلاميةوالتقليد الأعمى للغرب ومحاكاتهم فى كل ماهو سئ وهذا ينفى نظرية المؤامرة جملة وتفصيلا
ولكن انا برضه متفائل ان ممكن من هذا الركام يخرج جيل قادر على احداث التغيير و التغلب على العقبات التى تواجهه لان احنا عندنا العقول و الكفاءات اللى محتاجة انها تتحرك وماتستناش اما ربنا يسهل أو توظيف الحكومة لان الدولةمسئولياتها اكبر مما يتخيل
اعتقد ان احنا بقليل من المجهود و الرجوع الى ثوابت الدين والقيم والأخلاق نقدر نصلح حاجات كتير كما قال الله تعالى(ان الله لا يغير ما بقوم حتى يغيروا ما بأنفسهم)
آسف على الاطالة الشديدة
و شكرا على الموضوع واستمر دايما

۩۝۩ Dr. Flavio ۩۝۩ said...

لا مقال جامد جدا يا أبو حميد

عجبتني قوي الحته الأخيره

وانك بتحمد ربنا ان مفيش دلوقتي زعيم زي سعد زغلول

وبقول لك

إحمد ربنا ألف مليون مره إن مش زعيمهم سعد الصغير

لك كل التحيه علي موضوعك الرائع أنت ود. أحمد خالد

Casper said...

Last Knight:

تحياتنا كلنا ليك يا ماضى باشا

نورتنا

لو انت مقتنع بكده فعلا حاول تقنع الجيل اللى قبلنا يسيبلنا الراية بقى

:D



Gameel:

Ok I agree with u but I think youth is the most important element in our nation to (believe in his ability) and work for that!

Casper said...

Sasa:

مظبوط يا مصطفى ده اللى أنا بقول له دايما

مانشغلش دماغنا أبدا بايه سبب الوضع ده

ماشى ممكن نفكر فيه بس الأهم نفكر فى طريقة للخلاص منه

متفقين
!


Rana:

أيوة معاكى اننا مش قادرين ناخد الراية بس ده عشان فيه ناس من الجيل القديم مش عايزين يسيبوها أصلا
يعنى مثلا عندنا كام موظف شاب من جيلنا شغال فى المصالح الحكومية؟؟

ولا كام وزير فى التلاتينات من عمره على الأقل؟؟

ولا واحد , طب ازاى هنحكم على جيلنا ده انه مايقدرش يغير وهو ماخدش الفرصة أصلا , ولما هياخدها هيبقى هو الجيل القديم ساعتها

ماينفعش
!

Casper said...

Khalifa:

بالظبط نفس ردى اللى قلته فوق

بس جيلنا (أعتقد مش هيبقى هو المميز

لأ أعتقد ان هو اللى هيربى الجيل اللى يقدر يغير

دى توقعاتى الشخصية

لأننا جيل فاهم بجد , بس متكتف



Something like love:

مرحبا بيكى يا دكتورة
:)

أيوة فعلا فيه ناس كتير من الجيل السابق متعاطفين معانا

لأنهم عارفين اننا مش بنبدأ من الصفر , لأ بنبدأ من السالب

ودول بقى اللى أتمنى اننا مانكسفهمش أبدا

Casper said...

Dr.Abotreka:

هع هع هع هع

ماتنساش اللى اتفقنا عليه ياعم الشيطان الصغير

عايزين نبقى شياطين بجد
;)



7oooooooooda:

أهلا أهلا أهلا بضيف الاليفينز العزيز

انت ايه اللى جابك هنا؟؟

:D

اوعى تزعل أنا متقمص دور ديعو بس

ثم ازاى بتقول ان الجيل الجديد أحسن من اللى فات , انت نسيت ان الجيل الجديد ده فيه ديعو وجميل؟؟

راجع كلماتك يا أخى

;)

Casper said...

Zi One:

يا عم شريف يتكلم باسم الجميع اللى محروق من الوضع ده

ولا ايه؟؟؟

نورتنا بجد



Ods:

وانا والله يابنى من أشد المعجبين بمواضيعك والبوست الأخير خاصة ودماغك وأفكارك ككل

تسلمممممممممم

Casper said...

David Charle:

يا راجل كنت هزعل منك أوى لو ماكنتش قلت جملتك اللى فى الآخر عن جيلنا

انك متوقعله خير ان شاء الله

لأن كل الأسباب (المنطقية والموضوعية والصحيحة بلا شك) اللى قلتها مش بسببنا احنا خالص حتى وان كان لينا ذنب فيها فالذنب الأكبر مش لينا أبداااااااا
نورت ومستنيين قادم الزيارة


Mahmoud farag:

نورت يا محمود أنا فتحتهولك مخصوص أهو

وصلت اأمانة يعنى الحمد لله

;)

على فكرة نص الشباب بيحلم يشتغل فى فرقة سعد الصغير

خليك واقعى برضه

بس دول هيشمشو وراه يهتفو ايه:

العنب العنب العنب؟؟؟؟

Mohamed Hesham Safa said...

تعيش تعيش تعيش

م/ الحسيني لزومي said...

بالطبع المسؤليه مشتركه وليس الشباب هم الطرف الوحيد فيها