Tuesday, December 25, 2007

سلامو عليكو.
ايوه هو انا .الحق اكتب اي حاجة قبل ما النت يقطع.
بعد التحيات و التهاني ....
عندي قصة و سؤال. نبدأ بالقصة: هي القصة دى حصلت معايا العيد اللي فات دا و حبيت اشارككم بيها. القصة بدات لما تعبت في العيد و ما عرفتش اعيد و بعدين جه تالت يوم وقولت لازم بقى اعمل اي حاجة و كنت قاعد مع اصحابي فجت فكرة... ما تيجوا ندخل سينما ...والله فكرة . و بعدين الناس كلها قالوا ماشي سينما.طب امتى؟ اتفقنا على الميد نايت.طب فلان هاينزل السوق يشتري كذا و التاني في محل ابوه بيعمل كذا الى اخره.المهم نزلنا من الساعة 8 ولأن كل واحد وراه حاجة و انا مصر على المشروع فكان لازم انا اللي اشوف السينمات و اقطع التذاكر وغيره.طب في مشكلة العدد كبير واحنا من سبرباي زي ما انتو عارفين و هانطلع من السينما الساعة تلاتة يعني عايزين كمان عربية .طب نرجع انا وعماد نجيب عربيتهم .نروح السينما .يقوللك الحجز الساعة 10 الدنيا زحمة موت و عشان نعدي من قدام الشارع بتاع السينما ييجي نص ساعة.و بعدين نمشي وارجع الساعة 10 و اقف في الزحمة تاني اقطع التذاكر و امشي يتصل بيا واحد و معلش اقطعلى كمان تذكرة ارجع تاني و الزحمة و النص ساعة . واقطع وامشي يتصل كمان واحد طب معلش كمان تذكرتين و اعيده تاني . عذاب و كل دا وانا مصر جدا ان الموضوع يمشي و دي كمان مش كل التفاصيل دي صورة للمثال بس . واخيرا الشباب وصلوا و انا مستني قدام السينما و قولت فرجت لقيت الدنيا اتزحمت جدا قدام الباب و قالولي السينما باللي يدخل الاول يعني لازم تزاحم عشان تاخد مكان كويس عيد بقى. طب نقف في الزحمة . لا انتا لا . انتا تستنى الناس اللي لسه ما جاتش مش انتا اللي معاك التذاكر!!ماشي استنى...وقعدت اتفرج على الناس اللى قدام السينما . زحمة رهيبة اكتر حتى من الناس على طوابير العيش!!!كل الشباب دا جي دافع فلوس و بيزاحم و صابر الصبر دا كله عشان يدخل سينما...!!ولقيت واحد اعرفه متكدر قوى عشان ناقصه تذكرة لواحد صاحبه و مش لاقي و جه يسألني معاك تذكرة زيادة قولتلو لا فمشي وهو زعلان قوي. قعدت افكر في اللي انا شايفه و في الموقف اللي حصل دا و فجأة لقيت الساعة عدت 12 و الناس لسه ماجتش. اتصلت باصحابي اللي دخلوا فقالولي انهم حاجزين اماكن كفاية. قعدت استنى و ادور على المتأخرين في وسط الزحمة لحد ما جم اخيرا . خدت نفس عميق اخيرا خلص الموضوع على خير.طلعت التذاكر واديتهالهم . خدوا التذاكر و جريو بسرعة عشان يدخلوا و بعدين واحد فيهم افتكر فوقف و بص وراه لقاني واقف مكاني . سألني ... مش جاي؟ لقيت نفسي ببص على التذكرة بتاعتي وما رديتش عليه. مشيت اديت التذكرة للراجل اللي كان ناقصه تذكرة و متكدر عشنها وركبت العربية و روحت اناااااااااااااااااااااااااام.
السؤال دلوقت حد حصله حاجه زي دي قبل كده؟
. قصدي يعني تيجي عليك لحظة تلاقي نفسك بتعمل تصرف غريب جدا وتحس ان اللي بيعمل التصرف دا واحد تاني و انت بتتفرج عليه. !!!
شاركونا.............

4 comments:

der Kaiser said...

ههههههههههه

بالنسبة للموقف فهو جديد..جديد يعنى

بالنسبة للتساؤل؟؟
اه..انا احيانا بعمل كدة

Nothing`s worth said...

هههههههههههههههههههههههههههههههههههههههههههههههههههههههههههههههه
البطيخه صح؟
ايه يا قدس ده
انا من سبرباي وكنت عيان و رحت احجز والدنيا زحمه موت و كا ما احجز وامشي واحد يكلمني يقول كمان تذكرة ووقفت استنى والساعه عدت 12
هههههههههههه
انتا محظوظ اوي على فكره
بس بجد والله انا فهمتك يا محمد
كتير بتحصل الحكايه دي وتتفرج على بتعمله انتا نفسك من بره وانتا مستغرب
بس سيبك انتا نورتتتتتتتتتت :)

dr_abotrika said...

دي ولعت يا عم محمد...قدوس النجم بنفسه
هههههههههههههههههه
علي فكره لو حد غيرك عمل كده عمري ما اصدق ابدا لكن الجميل فيك انك بتعمل حاجات محدش متوقعها وده يدل علي انك غير نمطي
يعني انا مثلا امبارح لقيت واحد صاحبي بيشرب سجاير...ايه اللي ممكن يخلي واحد زيي يشرب سجاير وانا مبحبهاش ولا بحب اللي بيشربها
ومع ذلك كانت السيجاره في ايدي عادي جدا وبشربها عادي جدا
تتوقع ليه واحد بيكره السجاير ومع ذلك بيشربها
عشان يقلل الضرر علي صديقه اللي بيشربها
(صدق اولا تصدق)
حصل فعلا امبارح الاثنين 23 من ديسمبر
ويمكن كاسبر شافني واتعجب

علي العموم انا فرحان جدا انك كتبت
سلاااااااام

Casper said...

أراااااااااااااااهنك يا قدس انك بدأت تكتب فى البوست ده من ساعة مااخترعو البلوج سبوت أساسا

لما قالو قدس هيكتب النهارده قلت أكيد هنشوف البوست ده قبل الحرب العالمية التالتة على طول

بس سيبك انت يا قدس

موقف جااااااااامد ولو كان اتحكالى من غير ماأعرف مين صاحبه كنت قلت انت مفيش غيرك يا باشا

*****

بصراحة الموقف ده بيحصللى كتير

وأكبر عدد من المرات كان فى شهر 3 اللى فات

الحمد لله